عن الاسبريسو – كيفية تحضير الاسبريسو

للزوار الجدد في سلسلة القهوة تكلمنا عن تاريخ القهوة و معلومات عن القهوة والفرق بين الريبوستا والارابيكيا وبعدها تكلمنا عن القهوة المتخصصة والقهوة التجارية؛ السلسة نجاحها كان مُرضي جداً بالنسبة لـي، شكراً للداعمين وللأصدقاء.


 

الإسبرسو مشروب له عدد مهول من سكان العالم يستخدمه يومياً؛ في مصر الإسبرسو مُهان جداً من حيث جودة البن والتحضير والمفاهيم المغلوطة ، الباريستا بيقوم بعملية تحضير القهوة عموماً في مصر ينقصه خبرة كبير، يستخدم قهوه رديئة بتسبب مشاكل في المعدة وصداع في الرأس، في بعض الأماكن اكتشفت إن الباريستا بيحضر القهوة بيستخدم كمية تقضي شوت إسبريسو سينجل فيشتغل بيها اكثر من مره ويحضر بيها أكثر من كوب، ودا نتيجته شوية مياه فيهم ريحه مقرفة بس، مالوش أي علاقة بالقهوة.
في المقال ده محاولة لتصحيح مفاهيم القارئ عن صناعة الإسبرسو و إزاي كوب الإسبرسو المضبوط بيتحضر.

يعني ايه إسبريسو
عـلي حد بحثي وفهمي وسؤالي حبايبنا المتواجدين في إيطاليا، إسبريسو يعني القهوة الطازجة، مش القهوة السريعة زي ما هوا شائع إستنادا إلي إنها تحريف لكلمة إكسبريس  أحياناً بتلاقي ناس يطلبو قهوة “إكسبرس” أي سريعة، ولكن المعنى الحقيقي لها في إيطاليا هو أن تحضر القهوة “الآن”

يتكون من إيه الإسبرسو
قهوه الإسبرسو هيا مزيج من البخار والمياه الساخنة بدرجة حرارة أكثر من 80درجة مئوية وأقل من 86، بقوة ضغط من 15 إلي 18 بار بتعدي بين البن المطحون طحن ناعم نسبياً ومتحمص تحميص غامق عشان تديك فنجان إسبريسو له وش كريمي وقوام متوسط وكافيين كتير نسبياً مقارنة بالكمية.

أنواع البن والكمية المستخدمة في تحضير الإسبرسو
أغلب الكافيات المشهورة بفنجان الإسبرسو في العالم كله بتحضره بطريقتها الخاصة (السرية)، إختيار البن ,نوعه” ريبوستا ولا ارابيكيا “النسب , مكان زراعته, تحميصه و طحنه، فبناءً عـلية تقريباً مفيش طريقه “ستاندرد”؛ عشان كدا ها أعتمد عـلي تجربتي وخبرتي المتواضعة في كتابة المحتوي ده.
-خلطة القهوة إلي بستخدمها وأستحسنها هي:
30% ريبوستا 70% أرابيكا، بيتم تحميصهم عـلي الدرجة القبل الأخيرة من الخمس درجات الكلاسيكيين ( الغامق المتوسط) ما بين الـ city roast و الـ full city roast زي ما الأجانب يقولوا


– القهوة بعد التحميص بـيومين عـلي الأقل (عشان تثبت فيها الروائح والزيوت وتديك أعلـي كفائه من حيث الطعم والرائحة والخواص) بيتم طحنها، الطحن الي بفضله طحن متوسط ميال للنعومة زي حبات الملح تقريباً، عن تجربه يفضل حفظ حبات البن في مكان جاف خالي من الرطوبة تماماً وطحنها اول بأول عند الحاجة، أو شراء الكمية لا تزيد عن شهر عشان تحتفظ بخواصها أطول فترة ممكنة

-الكمية المستخدمة بتكون بناءً عـلي كمية الاكواب المحضرة في المرة الواحدة، أو حجم الكوب، سينجل شوت / دابل شوت / ترابل شوت، أنا أستخدم في فنجان القهوة الدبيل من 25 إلي 30جرام قهوة تقريباً،

تحضير الإسبرسو
يتم وضع البن في “الهاند”ومساواتها، في قاعدة للمبتدئين ممكن إتباعها وهي تحريك البن في أربع اتجاهات الهاند زي ما في الصورة


مساواة البن بحيث يكون يملئ كل حواف وجوانب الهاند، وبعد كدا نضغط عـلي البن ده عشان المياه والقهوة يتفاعلوا بشكل يخدم طعم ورائحه فنجانك
الضغط : الفن كله في الضغط هو إجبار الماء والقهوة عـلي التفاعل قبل النزول، الضغط بيكون بـأداة بسيطة ليها أشكال كتير اسمها تامبير Tamper

بعد عملية الضغط البن بيكون جاهز عشان يدخل عـلي ماكينة الإسبرسو وضغط المياه والبخار بدرجة حرارة كافيه إنها تذوقك الأورمة وكل العناصر الي بتنقلك من حاله الكسل والخمول لحاله البهجة والسرور.
بعد التركيب عـلي المكينة (حاول بعد تركيب الهاند متسيبوش أكثر من 30 ثانيه بدون إنزال المياه لان الاستانليستين المتواجد علي فوهه المكينة يكون سخن جداً فيقوم بحرق القهوة ويؤثر عـلي الطعم)


تأكد من غسل فوهه الماكينة قبل تركب“الهاند” عـلي الماكينة بانك تسيبها تنزل مياه لمدة 30 ثانيه عشان تتأكد إن مفيش عوالق تأذي فنجانك
استقبل القهوة في فنجان صغير ساخن بفعل وضعه أعـلي ماكينة القهوة أو بتسخينه بماء ساخن ليحافظ علي حرارة الفنجان في الطقس البارد لمدة تبدء من 20 إلي 25 ثانيه.. بعد ذلك استمتع

نصائح للحصول عـلي كوب إسبريسو قوي
1- أجعل “الهاند” نظيفة وجافة
2- بعد 100 فنجان اغسل الماكينة بـمنظف الماكينة
3- حافظ عـلي نظافة الماكينة أثناء استخدمها ستسهل عليك عمليه التحضير التالية
التزم بتفاصيل
4- جرب أكثر من مرة، لحد ما توصل للفنجان إلي يخليك مبسوط وراضي عن أدائك


5- الإسبرسو هوا أساس المشروبات (الامريكانو / اللاتيه / كابتشينو / فلات وايت / ميكاتو / كورداتو / ريستريتتو / موكا / أفوجاتوا / بريفي / لينجو / لونجو بلاك
6- الإسبرسو في ناس بتحب تحط عليه سكر الناس دي فاتها كتير قوي

Advertisements

11 thoughts on “عن الاسبريسو – كيفية تحضير الاسبريسو

  1. تسلم ايدك يا بوب
    انا بعشق القهوه عموما بس من كلامك عنها حبيتها اكتر
    القهوه بانواعها من اهم الحاجات فالدنيا والله

    Liked by 1 person

  2. ياليت تسوي لنا بحث شامل لاجهزة ومكاين القهوة من امازون بالذات ومن غيره اذا وجدت اسعار منافسه
    صراحه المكاين كثيرة واسعارها عجيبه غريبة فياليت تعمل موضوع اخر يكمل تحفتك الجميلة بالحديث عن القهوة
    ولن ننساك في كل رشفة قهوة سنحتسيها وستكون ذكراك مخلدة هههه
    الف شكر حبيبي جهد رائع منك
    محبتي وانتظر تفاعلك

    Liked by 1 person

    1. سيد وليد / شكراً لك❤️ .. بالفعل جاري تجهيز مقال كامل عن كيفية اختيار ماكينه اسبريسو مُناسبة لاحتياجاتك وإمكانياتك.
      شكراً لدعمك

      إعجاب

  3. الله عليك مبدع كالعادة جميل جدا والله بعد ماقريته قمت عامل فنجان اسبريسسو 🙂 انا عندي سوال بالنسبة للمكنات الحديثة الشائعة متل keurig الي بتحط فيها اقراص قهوة مضغوطة، هل يعتبر الاسبريسو فيها ذو جودة عالية؟ فيه اقراص من ستاربكس وانواع اوربية كتيرة

    إعجاب

    1. أنا مبسوط جداً بردك ومبسوط إني حمستك تشرب اسبريسو 🙂
      جربت النوع دا من المكينات من nespresso أنا شايف إن الموضوع مفيد أكثر للناس الي حبين يشربو قهوة سريعه التحضير، أنا بحب أتحكم في كل تفصيلة في القهوة، القوام اللون درجة الحرارة، كمية البن كل دي حاجات أظنها مهمه لتحضير كوب قهوة مثالي، الكبسولات إلي جربتها كانت جودتها معقولة ممكن نقول عاليه بالنسبه للقهوة التجارية، لاكنها لا ترتقي لمرحلة القهوة المتخصصة
      ها أستني منك تشاركني طريقتك المفضله في تحضير الاسبريسو، وياريت نوع البن المفضل لك.

      إعجاب

      1. انت مبدع ولو اني متأخر لكن عندي سؤال عن الاسبيريسو انا اشتري قهوة اسبيريسو من محلات غالية ولقيت قهوه تركية بنصف السعر في سوبر ماركت هايبر كبير نوعين واحد غامق وواحد افتح شوي زي اللي حضرتك قلت عليه كريمي هل يصلح اعمل منه اسبيريسو او هو ليه قهوه خاصة وطريقة تحميص معينه

        إعجاب

      2. تسلم ❤️ طحنه الاسبيرسو بتكون اخشن من التركي والسبب عشان المياه لما تخش عـلي حبيبات البن المضغوط تقدر تتغلغل وتسوي البن بشكل يضمن لك كوب اسبيرسو محترم

        إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s